..

..............

۞ عـلى غـبة محـيط الشعـر ۞

.............

.....

على غبّة محيط الشعر حرّك مركـب القيفـان

                     تنطّح موجه العالي وداعـب نسمـة  اشعـاره

تحرك بالمثايل من هجوس الخاطـر الحيـران

                     ويبحث داخل اعماقه عـن اللولـو  ومحّـاره

هجوسي ياهجوسي طال وقتي والفرح ما بـان

                     ليامنّي بنيـت السـاس عيّـا يثبـت  اجـداره

ليا مني صدقت الـود بانـت جفـوة الخـلان

                     عجايب يالغرام اللي عجزنـا نقطـف اثمـاره

اغمّض و اجحد الواقع وعدّي كن ماشي كـان

                     واقول الوقت يتبـدّل وخلـي بقبـل  اعـذاره

واقول ان الهوى قاسي ولايسلم من  الاحـزان

                     ولا نستعـجـل الاحــداث والايــام دواره

ولكن كل شي ٍ له حـدود وطـوّل  الهجـران

                     واشوف ان الخطا يزداد في حجمه و معيـاره

وبعد نزف الدموع اللي شكت من سيلها الوديان

                     وزفرات الضمير اللي توقـد ماطفـت  نـاره

تذكرت الصديق اللي يخفف لوعـة الحرمـان

                     صدوق ٍ في شعوره واعتلى بالقلـب  مقـداره

صديق ٍ مثل طيبه ما انوجد في هالوجود انسان

                     انا اقصد وقتنا الحاضر وكل وقت ٍ له اخيـاره

اخصّه بالكلام وقدم عينـه واضـح  البرهـان

                     سهر واحزان والحر القطامي يفهـم  الشّـاره

ياوافي كل مامديت كف الطيب ( جا)  نكـران

                     وش الحيله ترى مثلك عزيز ونتبـع  اشـواره

الشـــــــــــــاعـر

الـســــيــف

شاهد الموضوع الأصلي